كان يا مكان

وليت زمانك يا نيوتن يعود يوما

2008-08-19T12:09:00.000-07:00

ينص قانون نيوتن الثالث على ان لكل فعل رد فعل مساوى له فى المقدار ومخالف له فى الاتجاه وعلى نفس خط العمل

ولكن لا يا نيوتن لا والف لا,لست انت من تسن القوانين بل نحن المصريون نفعل,فليتك حى الان لترى كم انجز المصريون من بعدك

بلا فخر اثبت المصريون بجداره قدرتهم على جعل الافعال خاليه تماما من ردود الافعال

يهانون ولا رد

يشردون ولا رد

,يجوعون ولا رد

,وحتى يعطشون ولا رد

,يسلبون اهون حقوقهم ولا رد

تدمر حضاراتهم وقيمهم ويدمر دينهم ولا رد

وليت زمانك يا نيوتن يعود يوما

قناه تحارب قواعد الاسلامOTV

2008-01-23T19:21:00.000-08:00

Otv

قناه ناجحه جدا,نجحت فى وقت قصير واصبحت تنافس قنوات بقالها زمن
اعتقد ان سبب نجاحها يتمثل فى الاتى:

بتنزل الشارع كتير وليها مقابلات مع الشعب كتير.
معظم مذيعيها من الشباب وده بيشد الشباب اللى هما اكتر ناس بيتفرجوا على التليفزيون.
برامجها مفيده ومتنوعه.
من وقت لوقت بتجيب تقارير عن اماكن واحداث فى مصر ناس كتير متعرفش عنها حاجه او بالاخص انا اللى معرفش ممكن علشان انا مش من القاهره
.
شكل القناه حلوه وشغل الجرافيكس بتاعها ظريف
وهى دى الاسباب اللى جايه فى بالى دلوقتى
اه صح ويمكن تكون علشان معروفه انها بتاعت ساويرس الراجل اللى كل ما يحط ايده فى حاجه تنجح

ساويرس

الراجل ده مش سهل ابدا والقناه دى فيها سياسه خطيره فى طريقه ادارتها وتتمثل هذه السياسه كما اراها كالتى:

فى اول برنامج فى اليوم بيجيبوا حظك اليوم وكلام الابراج والخرافات دى,وطبعا اللى بيقرا الحاجات دى -وبيتهيالى اللى بسمعها نفس الحكم برده-مبتتقبلش منه الصلاه كام يوم-مش فاكره كام-واللى بيصدق فيها بقه يعيد النظر فى اسلامه
.

مره شفت فيها فيلم تسجيلى- بس الكلام ده من زمان شويه فبلاش تدققوا فى التفاصيل اوى - اسمه (حاره الاربعين)ملخص فكره الفيلم ده عن شقه فى بيت فى حاره الاربعين
فى القاهره الشقه دى ثمنها رخيص جدا لان ببساطه اللى بيسكن فيه بيموت بطريقه غريبه جدا بعد اربعين يوم من سكنه فى الشقه- سبحان الله هو فيه حد بيعرف هوه هيموت امتى-والمهم ان الراجل اللى مصدقش الكلام ده وسكن فى الشقه فعلا مات او اختفى مش فاكره
.
90%من البنات اللى بستضيفهم القناه سواء فى الاستوديو او فى الشارع مش محجبات وكتير منهم مش مسلمات بالذات اللى فى الاستوديو طبعا مسيحيين و10%من المحجبات بيبقوا المحجبات اللى فى الاسواق
. فكره ان يكون فيه رجل اعمال على ديانه معينه بيحاول يخدم دينه دى حجه انا اشجعها مش اقف ضدها-مع اختلافى مع الطريقه- بس الظلم بقه ان هما يدوا الفرصه للمسيحيين فى مصر انهم ينجحوا ويخدموا دينهم وكل اما مسلم -بمعنى الكلمه-ينجح وعايز يخدم دينه يقفوا قصاده ويحجزوا على ممتلكاته ويشردوه

السويس..يا عينى عليكى يا بلدى

2008-01-16T17:54:00.000-08:00

اوعى تغرك الصوره اللى فوق
السويس
تتميز السويس بوسع هائل يمتد من بورتوفيق الى مدينه السلام الجديده ومابينهما من السويس والنمسه والاربعين وشل والصباح والامل والسادات والجناين-دى عالم تانى لوحدها-وعتاقه ولكن المشكله الذريعه فى طريقه تقسيمه البلد اغبى طريقه على وجه الارض البيوت كلها لازقه فبعض مفلتش من كده غير المساكن وبورتوفيق حتى لما عملوا مدينه جديده الى هيا مدينه السلام برضه المسافه بين البيوت ضيقه جدا وغير كده من اول الملابس لحد البهارات ممكن تشتريه من مكان واحد النمسه والبر التانى علشان كده تلاقى البلد كلها فى الحته دى مافيهاش نفس
النظافه
البلد 20%نظيفه و80؟لا بورتوفيق جزء كبير منها نظيف والمساكن تقريبا كده برضه وبقيت البلد مليانه صناديق قمامه والصناديق كلها مليانه والقمامه مكمله حواليها وده سبب ان الغربان بقت اد الناس فى البلد هى الغربان من فصيله الطيور...اشك فى الموضوع ده اكيد صنفوها غلط ده انت تعد تهش فيها ساعه متهشش بس للامانه هما ليهم فايده جباره برده بيصحونى كل يوم الصبح بدرى حاجه معملهاش المنبه
الاقتصاد
بلد اقتصادى هائل ,فيها قناه السويس اللى بتدخل سنويا3مليار وكام مليون دولاربنشوف منهم ايه دول لو كانوا صرفوا جزء من جزء بسيط جدا على الفقراء هنا مكنش هيبقى فى فقراء اصلا ده غير ميناء السخنه والادبيه وعتاقه واليتكه وشركات السخه والبترول يعنى بتهيألى السويس من اغنى محافظات مصر
الخدمات
مليانه بنوك وعماله تزيد ما شاء الله ومكاتب بريد ومش عارفه ايه بس تيجى تشوف الخدمات جوه مش هتلاقى ياريتك هتلاقى خدمات وحشه لا انت مش هتلاقى اصلا ممكن تبقى عايز خدمه مثلا وواقف فى الطابور لوحدك ومفيش زحمه ولا حاجه بس الموظف او الموظفه مش معبراك تعد تنده عليها ساعه ولا كان فى بنى ادم قدامها ده لو هواء ممكن يخليها تكح ممكن توصلك انك تنده للى جمبها علشان تندهلها وبلا جدوى طب اللى زى دى حلها ايه مش عارفه
نيجى لل..لل مش عارفه اسميها ايه كارثه ولا مصيبه ولا ايه,مشكله المياه-اهى طلعت مشكله فى الاخر-هى دى مياه اصلا بتهيألى لمولهم شويه حيوانات ميته على كميه اكوام زباله على مياه مجارى وقالوا نعصر ونشربهم وانا شفت ده بام عينى ولولا ذلك ما كنت صدقت كل ده فى ترعه السويس الى جايه من ترعه الاسماعيليه وموضوع الميه ده هو السبب الرئيسى لتفشى مرض الفشل الكلوى اللهم احفظنا بتهيألى من كل 6 فى 3 عندهم المرض ده فى السويس فيها ايه يعنى لو عملوا احدث الطرق فى تنقيه المياه هيقولوا منين ده احنا غلابه,كل ده وغلابه
طاقات السويس
المشكله دى ممكن ناس تبصلها انها هينه بالنسبه للى فات بس انا شخصيا شايفه انها مشكه خطيره ولو اتحلت هتبقى فايده كبيره هى مشكله هدر الطاقات مفيش ابدا حد فى السويس يبقى عنده موهبه ويبقى عنده ادنى امل انه ينميها لان بكل بساطه مفيش اى نادى من النوادى هنا كفاءه ولا مستوى النوادى هنا عامله زى المدارس الحكوميه فى عدد الطلاب وطريقه التدريس والمعامله وما الى اخره وفى حاجه تانيه النوادى عندنا مافيهاش ايام ولا حته اوقات للبنات ده مش ظلم برده
اه صح فى سوال كده كنت عايزه اساله قبل ما انساه المحافظ بتاعنا بقالوا كام سنه قاعد فيها اصل انا من ساعه ما وعيت عالدنيا وحاسه انه هوهو معرفش دى بركه فى المده ولا هو فعلا كده؟

لا تعليق

2007-09-29T15:02:00.000-07:00

http://www.youtube.com/watch?v=fJuNgBkloFE
ولا هما فاهمين حاجه ولا عارفين حاجه وده اللى مخللى جورج بوش قادر يضحك عليهم بسهوله جدا وهو بقى اللى هيخلصهم من الارهاب اللى المسلمين الوحشين بيعملوه

محدش واخد منها حاجه

2007-09-18T21:09:00.000-07:00

والله الدنيا دى قصيره جدا وكل شويه يحصل حاجه تخلى محدش يفتكر ابدا ان لسه بدرى بس للاسف مش كل الناس بتاخد بالها...انا الحمد لله كل فتره بحس بحب ربنا ليا جدا يعنى ساعات بتجيلى اوقات واحس ان انا لسه صغيره عالموت واكيد مش هموت دلوقتى واعيش حياتى شويه بعدين ربنا يسهل وكل اما بتجيلى الوساوس دى بفوق عل حاجه شكل
(1مره احلم بالجنه وان انا فيها والحلم ده ادانى دفعه قويه جدا
(2ومره احلم بالكعبه حلم حلو قوى
(3ومره احلم بالنار بس انا مش فيها الحمد لله بس كنت على الحركرك وربنا ستر وكنت حسه فى الحلم ده بخوف محستوش فى حياتى كلها
(4واخر واصعب تنبيه كان امبارح لما ماما صحتنى على خبر صدمنى اويييي ان ولدين من ارايبنا هو انا صحيح معرفش هما يقربولنا ايه اوى بس هما ارايبنا من بابا وكنت باشوفهم كتير كانوا راجعين من القاهره من الكليه واتقلبت بيهم العربيه وماتوا
لا اله الا الله وانا لله وان اليه راجعون سبحان الله محدش ولا هما كانوا يتخيلوا ان هما هيموتوا بدرى كده زى بالضبط لما انا اموت هتقولوا مكنتش وهى بتكتب التدوينه دى ان هى هتموت بعديها معرفش بقد ايه
يا رب اغفر لهم وارحمهم واعفو عنهم واجعل قبورهم روضه من رياض الجنه ولا تجعلها حفره من حفر النار ويارب صبر اهلهم

هو احنا مفروض نعمل ايه

2007-09-08T12:09:00.000-07:00

اللى بيحصل ده مش معقول حرام اكيد كل مسلم هيتحاسب عليه الاسلام اتبهدل بعد مكان دين العزه والرسول اتشتم وهو الانسان اللى مفيش زي ولا هيكون فيه
ازاى بعد كل اللى كنا فيه فتحنا بلاد كتير وحكمنا بلاد كتير واكتسحنا معارك كتير ضد اعداء الاسلام وصلنا لدرجه الانحطاط دى وضاعت كل حاجه ضاع علمنا وضاع ادبنا وضاعت هويتنا وضاعت كرامتنا وضاعت قدسنا وضاعت مصريتنا
لو جينا نلقى نظره على حالنا هنلاقى مفيش حاجه بعد كده تخلينا نغير اللى احنا فيه ده خصوصا انه بايدينا وكلها حاجات واضحه زى الشمس بطاله والشباب بيتخرجوا مفيش شغل بس مفيش دى صعبه شويه هوه فيه لاكن ياما مش بالمؤهل ياما بمرتب عبيط جدا ميفتحش عشه فراخ مش ميفتحش بيت ومن هنا بتيجى مشكله تانيه طبعا كلنا عارفيها الا وهى العنوسه وسن الجواز اتاخر سواء للبنت او للولد وده طبعا اكتئاب وفراغ والفراغ ده لوحده مصيبه وبعد الجواز حاله اقتصاديه متدهوره وطبعا خناقات والام مشغوله فى الشغل وطبعا الراجل والولاد فى داهيه ويطلعوا شباب وشبات فى الضياع يكملوا حاله البعد عن الاسلام اللى احنا فيها على اساس ان البنت هتبقى ام وتربى اجيال والراجل هيبقى اب ويبث مبادى فاجيال برده وطبعا مع ضياع الاسلام ضاع السلام(ضاع السلام فى وطن السلام)على راى السيده فيروز
وطبعا بقت صورتنا فى الغرب اسوا ما يكون وعانى من كده كتير من المسلمين والعرب هناك وده طبعا خلى موضوع(خلوا بينى وبين الناس)اللى كانت الهدف للرسول عليه الصلاه والسلام اصعب بمراحل ومراحل
بس انا شايفه ان مش كل الناس وقفه مش بتعمل حاجه بالعكس علم ووبنتعلم مهما يصعبوا الامتحانات ومهما يصعبوا الظروف عالمصححين علشان يطلعوا قرفهم فى الورق بردو بنجيب99%و99.5%و100%لو عالسياسه بنبذل اقصى جهدنا ولو عالدعوه بندعو وبنعتقل وبنتمرمط وصامدين الحمد لله هنعمل ايه تانى
كنت عايزه اوجه رساله لكل مسؤول عن اى حاجه فى البلد دى حرام عليكو عملتوا كل حاجه في البلد وفينا كل ده علشان ايه لدرجه انكو سلبتونا حريتنا سيبونا بقى نفك شويه سيبو كل واحد يشوف طريقه فين
so we re doing but the question what should we do?

انت غبى؟ولا عامل غبى؟ولا ولا دى ولا دى؟

2007-08-24T16:29:00.000-07:00

على فكره ممكن اطلع انا اللى مش فاهمه فى الاخر
فى حاجه غريبه جدا انا ملاحظاها اوى علشان هى اصلا واضحه ان مع ان احنا-العرب-متضايقين جدا للى بيحصل فى البلاد العربيه والاسلاميه زى فلسطين والعراق ولبنان وغيرهم من احتلال وضرب نار وخراب وده طبعا من اسرائيل وامريكاوفنفس الوقت مش بس مبنقاطعش منتجاتهم ده احنا كمان معظم ده لو مكنش كل برامجنا سبونسورد باى بيبسى واول ناس بيعملوا كده هما اللبنانيين ,قناه ال بى سى مبتخلاش من بيبسى انا بقى نفسى حد يفهمنى ازاى يعنى هما بيدمرونا وفى نفس الوقت بندعمهم ماديا علشان نساعدهم يدمرونا اكتر...اخر هبل ولا انا اللى مش فاهمه؟
بيبسى بحر النجوم...قريبا على الشاشه مستعجلين على ايه

يا فرحه ما تمتشىى

2007-08-19T18:29:00.000-07:00

مبدايا كده انا بصمجيه فى الطبيخ وقبل ما ابدا احب اتوجه بخالص الشكر والعرفان الى من علمتنى الطريقه واعلمتنى بالمقادير بنت خالتى بوسى نرجع بقى لموضوعنا
انا اخرى اعمل شاى اقلى بيض ولما اقول انا بروفيشينال فى الطبيخ يبقى طبخت رز لكن المره دى الوضع مختلف يا جماعه انا عملت كيك يعنى فانيليا وبيكين بودر وبيض-بردو-ولبن وسمنه ودقيق يعنى خطوه جريئه جدا بس للاسف غلط غلطه شنيعه نسيت احط البيكين بودر اللى هو بينفش الكيك ويخليها كيك فطلعت معايا بسبوسه ويا سلام عالتهزيئ اللى خته والتريقه من جميع افراد العيله-اصل انا ساكنه فبيت عيله-واولهم بوسى شوفتو النداله

اللعب عالمشاعر

2007-07-30T19:27:00.001-07:00

حضرت من وقت قريب درس من اجمل دروس العلم اللى حضرتها والاكثر تاثيرا فيا المهم ان المدام المحاضره-بكسر الضاض-حكت لنا قصتين عجبونى جدا حبيت انى اقولهم لكم

واليكم القصه الاولى
فى احدى اليام التى تعود فيها سائق التاكسى ان ينزل ليسعى وراء رزقه قبل الفجر وفى طريقه اشار له يوقفه رجل عجوز جدا ظهره محنى فوقف له السائق واركبه وساله عن المكان التى يريد ان يتجه له فقال له عند اقرب مسجد وفى طريقهما الى المسجد اوقفهما رجل اخر وركب معهما فاستأذنه السائق ان يوصل هذا الرجل العجوز الذى بجانبه ثم يوصله فرد الرجل باستغراب شديد راجل ايه راجل مين فين الراجل ده انت مجنون يا راجل انت ولا ايه فتدخل الرجل العجوز-اللى عليه الكلام-علىالسائق ليريحه لا تتعب نفسك لن يرانى احدغيرك فرد عليه السائق منفزعا ليه انت جن فقال له لا انا ملك الموت ساذهب الى المسجد لاقبض روح شخص ثم بعد عشر دقائق ساتى لقبض روحك فتوقف السائق للحظه عن اى رد فعل من هول الصدمه ثم ترك كل شي وهرول مسرعا الى المسجد وحين انتهت العشر دقائق خرج ليبحث عن الرجل فى التاكسى فلم يجد اى من الرجلين ولا التاكسى
فكانت هذه حيله اتفق عليها الرجلين لسرقه التاكسى

القصه الثانيه
اشترت باكو بسكويت تاكله ومجله تتسلى بها وجلست تنتظر فى صاله انتظار بالمطارويجلس بجانبها رجل يحمل مصحف ويقرا فيه
هى:فتاه ايطاليه تكره المسلمين وترى انهم ارهابيون وهمجيون كباقى شعوب الغرب
هو:رجل عربى مسلم
اخذت تقرا المجله بينما تتناول البسكويت قطعه قطعه فلاحظت ان الرجل الجالس بجانبها يشاركها فى اكل البسكويت فهى تأخذ قطعه وهو ياخذ قطعه حتى اصبح كحقه فتوقفت عن اى رد فعل من كتر الغيظ-ايه الراجل البارد ده وعندها حق بصراحه-فتبقى اخيره وكان الدور عليه فانتظرت حتى ترى ماذا سيفعل فاخذ الرجل القطعه وقسمها نصفين فاعطاها نصف واخذ نصف فتركت المكان وحين صعدت الى الطائره وبينما تفتح حقيبتها تجد باكو البسكويت نفسه الذى اشترته فتذكرت انها حين اشترته وضعته فى حقيبتها وان ما كانت تاكل منه كان ملك الرجل
قيل ان هذه الفتاه اسلمت

ما اثار اهتمامى ان القصتين يلعبا على المشاعر

والله حرام

2007-07-27T16:42:00.001-07:00

بجد اللى بيعملو فينا ده حرام.. فعلا هو ده اللى ناقصنا.. ال توزيع جغرافى ال . يعنى واحده زيى علشان من السويس يبقى مكتوب عليا ادخل جامعه قناه السويس بالاسماعيليه طيب مش يغصبونا على جامعه كويسه ده انا حته سمعت ان لما بتتعرض وظيفه كويسه بيطلبوا جميع جامعات مصر الا جامعه قناه السويس دى وعندهم حق مناهجها سهله زياده عن اللزوم
ده غير ان من زمان وانا نفسى ادخل جامعه فى القاهره برضه هى العاصمه واقدر امارس فيها حاجات كتير مش موجوده هنا او موجوده على نطاق ضيق جدا
املى الوحيد دلوقتى ان ميكونش فى كليه حاسبات ومعلومات ف اسماعيليه وبكده اقدر ادخل جامعه القاهره ان شاء الله..حتى اكون اسمى خريجه جامعه القاهره ليها هيبه بردو

بدايتى

2007-07-23T09:45:00.000-07:00

بدايتى مع التدوين اليوم الموافق07\23\7وطبعا حدث فى مثل هذا اليوم ثوره يوليو الشهيره ولعل هذه الذكرى تكون دافع لى فى الاستمرار فى ما اريد وعلى الله التوفيق.
كان لاخى الفضل فى دخولى عالم التدوين ولكن فقط بمتابعه بعض الدونات وكنت كلما ادخل مدونه واقرا ما فيها من مواضيع وانتقل الى الاخرى اشعر اننى فى عالم اخر ...عالم المدونات احببته ورأيت فيه الحريه التى افتقدناها فى عصر الاستبداد الذى نعيش فيه واردت ان اشارك فيه ويكون لى مدونتى الخاصه اكتب فيها ما اريد-بس مش ما اريد اوى يعنى-
والحقيقه ان هذا الشعور انتابنى من قبل وانا صغيره كنت احلم ان ادون يومياتى ولم افعل والان عرضت الفكره امام امى واخى-اللى كان ليه الفضل ده-وللمره الثانيه شجعنى على ان افعل ما كنت احلم به منذ طفولتى ولكن عن طريق الانترنت حتى يراها الناس وربما تتداولها الاجيال من بعدى وهذا ما يميز المدونه الالكترونيه عن الورقيه(من وجهه نظرى),تحمست للفكره كثيرا مع بعض الاعتراضات التى اعرضها عليه حين نناقش اى موضوع واننى سوف يكون لى ترتيب بين المدونات الاخوانيات
المصريات....ولكن للاسف منعنى انشغالى بالمذاكره الشديده فى الثانويه العامه
ولكن ها اناذا حققت حلمى وادعو الله من كل قلبى ان يوفقنى